2026-da nə dəyişdi
1 yanvar 2026-dan özəl qeyri-neft-qaz sektorunda aylıq 8 000 ₼-dək əmək haqqına 0% gəlir vergisi güzəşti bitdi. Əvəzində mərhələli dərəcələr tətbiq olunur: 2 500 ₼-dək 3%, 2 500–8 000 ₼ arası 75 ₼ + 10%, 8 000 ₼-dan yuxarı 625 ₼ + 14%. 2027-də aşağı dərəcə 5%-ə, 2028-dən 7%-ə qalxır.
Özəl sektorda icbari tibbi sığortanın 2% dərəcəsi indi 8 000 ₼ deyil, 2 500 ₼-dək hissəyə tətbiq edilir, yuxarı hissəyə 0,5%. 8 000 ₼-dan yuxarı əmək haqqında işəgötürənin DSMF dərəcəsi 15%-dən 11%-ə endi. Ətraflı: 2026-da əmək haqqı vergilərində dəyişikliklər.
Əmək haqqından hansı tutulmalar var
| Tutulma | Özəl, qeyri-neft-qaz | Dövlət və neft-qaz |
|---|---|---|
| Gəlir vergisi | ≤ 2 500 ₼: 3% (əsas iş yerində 200 ₼ çıxılır) 2 500–8 000 ₼: 75 ₼ + 10% > 8 000 ₼: 625 ₼ + 14% | ≤ 2 500 ₼: 14% (əsas iş yerində 200 ₼ çıxılır) > 2 500 ₼: 350 ₼ + 25% |
| DSMF, işçi | ≤ 200 ₼: 3%; yuxarı hissə: 10% | 3% |
| İşsizlikdən sığorta, işçi | 0,5% | 0,5% |
| İcbari tibbi sığorta, işçi | ≤ 2 500 ₼: 2%; yuxarı hissə: 0,5% | ≤ 8 000 ₼: 2%; yuxarı hissə: 0,5% |
İşəgötürən bunlardan əlavə öz hesabına DSMF (özəl sektorda 200 ₼-dək 22%, 200–8 000 ₼ arası 15%, yuxarı hissə 11%; dövlət və neft-qaz sektorunda 22%), 0,5% işsizlikdən sığorta və işçi ilə eyni məbləğdə icbari tibbi sığorta ödəyir.
Nümunə: 1 500 ₼ əmək haqqı, özəl sektor
- Gəlir vergisi: (1 500 − 200) × 3% = 39,00 ₼
- DSMF: 200 × 3% + (1 500 − 200) × 10% = 6 + 130 = 136,00 ₼
- İşsizlikdən sığorta: 1 500 × 0,5% = 7,50 ₼
- İcbari tibbi sığorta: 1 500 × 2% = 30,00 ₼
- Əlinizə çatan: 1 500 − 39 − 136 − 7,50 − 30 = 1 287,50 ₼
İşəgötürən əlavə olaraq 239 ₼ DSMF, 7,50 ₼ işsizlik və 30 ₼ tibbi sığorta ödəyir. Bu işçinin şirkətə ümumi xərci 1 776,50 ₼ olur.
Eyni 1 500 ₼ dövlət sektorunda: gəlir vergisi (1 500 − 200) × 14% = 182 ₼, DSMF 45 ₼, işsizlik 7,50 ₼, tibbi sığorta 30 ₼, əldə 1 235,50 ₼.
Hazır cədvəl: özəl sektor, əsas iş yeri
| Gross | Gəlir vergisi | DSMF | Tibbi sığorta | Net 2026 | Net 2027 | Net 2028 | İşəgötürən xərci |
|---|---|---|---|---|---|---|---|
| 400 | 6,00 | 26,00 | 8,00 | 358,00 | 354,00 | 350,00 | 484,00 |
| 1 000 | 24,00 | 86,00 | 20,00 | 865,00 | 849,00 | 833,00 | 1 189,00 |
| 1 500 | 39,00 | 136,00 | 30,00 | 1 287,50 | 1 261,50 | 1 235,50 | 1 776,50 |
| 2 500 | 69,00 | 236,00 | 50,00 | 2 132,50 | 2 086,50 | 2 040,50 | 2 951,50 |
| 3 000 | 125,00 | 286,00 | 52,50 | 2 521,50 | 2 471,50 | 2 421,50 | 3 531,50 |
| 5 000 | 325,00 | 486,00 | 62,50 | 4 101,50 | 4 051,50 | 4 001,50 | 5 851,50 |
| 10 000 | 905,00 | 986,00 | 87,50 | 7 971,50 | 7 921,50 | 7 871,50 | 11 571,50 |
Cədvəldə 2027 və 2028 üçün yalnız gəlir vergisi dərəcəsinin qanunla təsdiq olunmuş artımı nəzərə alınıb, digər dərəcələr 2026 səviyyəsində saxlanılıb.
Gəlir vergisi üzrə güzəştlər
Vergi Məcəlləsinin 102-ci maddəsinə görə bəzi işçilərin aylıq əmək haqqının bir hissəsi gəlir vergisindən azad edilir. Güzəşt yalnız əsas iş yerində, təsdiqedici sənəd təqdim olunduqdan sonra tətbiq olunur.
| Məbləğ | Kimə | Maddə |
|---|---|---|
| 800 ₼ | Şəhid statusu almış şəxslərin valideynləri, dul arvadları (ərləri) və övladları | 102.1-1 |
| 400 ₼ | Vətən Müharibəsi Qəhrəmanları, Milli Qəhrəmanlar, Sovet İttifaqı və Sosialist Əməyi Qəhrəmanları, müharibə ilə əlaqədar əlilliyi olanlar, həlak olmuş döyüşçülərin dul arvadları (ərləri) və övladları, müharibə veteranları, 1941–1945-ci illərdə arxa cəbhədə təltif edilənlər, Çernobıl qəzası nəticəsində şüa xəstəliyinə tutulanlar, 15.09.2026-dan həlak olmuş minatəmizləyənlərin ailələri | 102.2 |
| 200 ₼ | 61–100% əlilliyi olanlar (müharibə ilə əlaqədar istisna), 18 yaşınadək əlilliyi olanlar, daimi qulluq tələb edən əlil uşağa və ya 81–100% əlilliyi olan şəxsə baxan valideyn, həyat yoldaşı, qəyyum | 102.3 |
| 100 ₼ | Həlak olmuş döyüşçülərin (şəhidlər istisna) valideynləri, vəzifəsini icra edərkən həlak olmuş dövlət qulluqçularının valideynləri və həyat yoldaşları, Əfqanıstana göndərilmiş hərbi qulluqçular, daimi məskunlaşmamış məcburi köçkünlər | 102.4 |
| 50 ₼ | Himayəsində azı 3 nəfər (o cümlədən gündüz təhsil alan 23 yaşınadək tələbələr) olan ər-arvaddan biri | 102.5 |
- Bir neçə güzəşt hüququ olduqda 800, 400, 200 və 100 ₼-dan yalnız ən böyüyü verilir (md. 102.7).
- 50 ₼ himayə güzəşti və 200 ₼ ümumi güzəşt (əmək haqqı 2 500 ₼-dək olduqda) ona əlavə olunur.
- Kateqoriya güzəştləri əmək haqqının məbləğindən asılı deyil, 2 500 ₼-dan yuxarı əmək haqqında da tətbiq olunur. Şkala güzəştlərdən sonra qalan məbləğə tətbiq edilir.
- Vətən müharibəsində iştirak özü-özlüyündə güzəşt vermir: 400 ₼ müharibə veteranı adı, müharibə əlilliyi və ya Qəhrəman adı olduqda tətbiq edilir.
- Güzəştlər DSMF, işsizlik və icbari tibbi sığorta haqlarını azaltmır.
Nümunə: özəl sektorda 1 500 ₼ əmək haqqı alan müharibə veteranı. Vergi tutulan məbləğ 1 500 − 200 − 400 = 900 ₼, gəlir vergisi 900 × 3% = 27 ₼ (güzəştsiz 39 ₼). Dövlət sektorunda 3 500 ₼ alan Vətən Müharibəsi Qəhrəmanı: 3 500 − 400 = 3 100 ₼, vergi 350 + 600 × 25% = 500 ₼.
2 500 ₼ həddinə diqqət
2 500 ₼-dək əmək haqqında əsas iş yerində 200 ₼ vergidən azaddır, 2 500 ₼-dan yuxarı isə bu güzəşt yoxdur. Ona görə əmək haqqı 2 500 ₼-dan bir az yuxarı qalxanda əldə qalan məbləğ azalır: 2 500 ₼-da net 2 132,50 ₼, 2 501 ₼-da isə 2 127,28 ₼ olur. Təxminən 2 508 ₼-dan sonra net yenidən 2 500 ₼-dakından çox olur. Əmək haqqını bu həddin ətrafında təyin edəndə bunu nəzərə alın.
Tez-tez verilən suallar
2026-da 8 000 manatadək əmək haqqına gəlir vergisi tutulurmu?
Bəli. Özəl qeyri-neft-qaz sektorunda 0% güzəşt 1 yanvar 2026-da başa çatdı. 2026-da 2 500 ₼-dək hissəyə 3%, 2 500–8 000 ₼ arası üçün 75 ₼ + 2 500 ₼-dan artıq hissənin 10%-i tətbiq olunur.
200 manat güzəşt kimə şamil olunur?
Əsas iş yerində işləyən və aylıq əmək haqqı 2 500 ₼-dək olan işçiyə. Gəlir vergisi (əmək haqqı − 200 ₼) məbləğindən hesablanır. Əmək haqqı 200 ₼-dək olduqda əsas iş yerində gəlir vergisi tutulmur. Əlavə iş yerində bu güzəşt yoxdur.
Net məbləğdən gross məbləği necə tapım?
Kalkulyatorda "Net-dən gross-a" seçin və işçinin əlinə çatmalı olan məbləği yazın. Məsələn, özəl sektorda əldə 1 000 ₼ qalması üçün hesablanmış əmək haqqı 1 159,77 ₼ olmalıdır.
İşəgötürən əmək haqqı üzərindən nə qədər ödəyir?
Özəl sektorda 1 500 ₼ əmək haqqı üçün işəgötürən əlavə 276,50 ₼ ödəyir: DSMF 239 ₼, işsizlikdən sığorta 7,50 ₼, tibbi sığorta 30 ₼. Ümumi xərc 1 776,50 ₼ olur.
Vergi və sığorta haqları nə vaxt ödənilir?
DSMF, işsizlik və icbari tibbi sığorta haqları növbəti ayın 15-dək, gəlir vergisi növbəti ayın 20-dək ödənilir. Muzdlu işlə bağlı vahid bəyannamə rüblük, rübdən sonrakı ayın 20-dək təqdim olunur. Bütün tarixlər: vergi təqvimi 2026.
Qazilərə və şəhid ailələrinə hansı güzəşt var?
Şəhid ailələrinə (valideyn, dul arvad və ya ər, övlad) ayda 800 ₼, müharibə ilə əlaqədar əlilliyi olanlara və müharibə veteranı adı almış şəxslərə ayda 400 ₼ vergi güzəşti verilir. Güzəşti kalkulyatorda "Vergi güzəşti" sahəsindən seçin.
Kalkulyatorun nəticəsi rəsmi sayılırmı?
Xeyr, nəticə məlumat xarakterlidir. Texnopark rezidentlərinin işçiləri üçün xüsusi dərəcə, hərbi qulluqçuların azadolması və əmək haqqına əlavə ödənişlər nəticəni dəyişə bilər.